Policia e Korçës ka finalizuar me sukses një operacion antidrogë, duke arrestuar shtetasin Petrika Treska, 34 vjeç, i cili ishte në kërkim për shpërndarje të lëndëve narkotike në qytet.
Sipas njoftimit zyrtar, Forca e Posaçme "Shqiponja", në bashkëpunim me specialistët për Hetimin e Narkotikëve, kanë ushtruar kontroll në një automjet ku dyshohej se udhëtonte i dyshuari.
Gjatë kontrollit fizik dhe atij në automjet, u gjet një sasi lënde narkotike e dyshuar kokainë, e ndarë në doza dhe e gatshme për shitje.
Në vijim të operacionit, Policia ka ushtruar kontroll edhe në dy banesa të përdorura nga 34-vjeçari, ku janë gjetur dhe sekuestruar sasi të tjera kokaine dhe kanabisi.
Nga hetimet rezulton se i arrestuari shiste kokainë dhe kanabis në lagje të ndryshme të Korçës, si dhe në ambiente publike dhe lokale.
Në përfundim të veprimeve procedurale, Treska u arrestua në flagrancë për veprën penale “Prodhimi dhe shitja e narkotikëve”.
Policia njofton se, në bashkëpunim me Prokurorinë, vijon puna për identifikimin dhe arrestimin e bashkëpunëtorëve të tjerë të përfshirë në këtë aktivitet kriminal.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
