Një vrasje me armë zjarri ka ndodhur mëngjesin e sotëm në Shkodër, teksa një person tjetër ka mbetur i plagosur sipas informacioneve paraprake.
Ngjarja e rëndë ka ndodhur këtë mëngjes në lagjen “Rus” të qytetit verior.
Viktima mësohet se është shtetasi Naim Bajri, 68 vjeç. I plagosur ka mbetur shtetasi Astrit Zeneli, 58 vjeç. Si viktima dhe i plagosuri janë banues në fshatin Dobraç, Shkodër.
Rreth orës 07:20, në vendin e quajtur "Merkata e Rusit", në lagjen “Partizani”, Shkodër, në rrethana ende të paqarta, është vrarë me armë zjarri shtetasi N. B., 68 vjeç, banues në fshatin Dobraç, Shkodër dhe ka mbetur i plagosur lehtë, jashtë rrezikut për jetën, shtetasi A. Z., 58 vjeç, banues në fshatin Dobraç, Shkodër. Gjithashtu në livadh, në lagjen "Guerrile", Shkodër, është gjetur i djegur një mjet që dyshohet të jetë përdorur nga autorët.
Janë ngritur pika kontrolli dhe po vijon krehja e zonës nga Policia vendore dhe FNSH Shkodër, si dhe janë nisur në drejtim të Shkodrës, grupe të RENEA-s.
Grupi hetimor, nën drejtimin e Prokurorisë, po vijon punën për zbardhjen dhe sqarimin e plotë të rrethanave të ngjarjes, identifikimin dhe kapjen e autorëve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
