Ushtria e Koresë Veriore i ka hedhur tri raketa të paidentifikuara në ujërat lindore. Ky veprim erdhi vetëm një javë pasi vendi komunist i hodhi dy raketa të tjera me rreze të shkurtër veprimi.
Raketat u hodhën nga qyteza Sondok, bëri të ditur komanda qendrore e ushtrisë së Koresë Jugore. Në këtë qytezë gjendet një bazë ajrore e ushtrisë dhe Koreja Veriore hodhi raketa edhe vitin e kaluar.
Ushtria e Koresë Jugore njoftoi se raketat e vendit fqinj fluturuan rreth 200 kilometra dhe e arritën lartësinë e 50 kilometrave nga sipërfaqja e tokës.
Ministri japonez i mbrojtjes, Taro Kono, tha se duket që këto ishin raketa balistike dhe ato nuk kanë rënë në zonën ekskluzive ekonomike të Japonisë, ndonëse qeveria është duke i hetuar hollësitë rreth hedhjes së tyre.
Koreja Veriore i hodhi dy raketa me rreze të shkurtër më 2 mars, tre muaj pas ndërprerjes së këtyre aktiviteteve. Lëshimi i raketave është mbikëqyrur nga lidere i shtetit, Kim Jong Un, shkruan “The Guardian”.
Pjongjangu është duke u përballur me sanksione të shumëfishta nga Kombet e Bashkuara, Shtetet e Bashkuara, Koreja Jugore dhe vendet e tjera për shkak të programit të armëve.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
