Zjarri në tregun e Shkodrës/ Policia: Dyshohet se e shkaktuan dy të mitur, ishin duke luajtur

Policia e Shkodrës ka dhënë të tjera detaje sa i përket zjarrit të rënë një ditë më parë në tregun e rrobave të vjetra në këtë qytet.

Efektivët e qytetit verior shprehen se zjarri në tregun e rrobave të vjetra në qytet është shkaktuar nga dy djem të mitur, të cilët kanë qenë duke luajtur.

Strukturat Hetimore të Drejtorisë Vendore dhe të Komisariatit të Policisë Shkodër nën drejtimin e Prokurorisë, kanë vijuar intensivisht hetimet për zbardhjen dhe dokumentimin ligjor të ngjarjes në tregun e rrobave të përdorura ku si pasojë e zjarrit të rënë u shkaktuan dëme të shumta materiale.

Si rezultat i veprimeve hetimore të kryera rezultoi se dy të mitur 9-vjeçarë që kanë qenë duke luajtur në afërsi të tregut, dyshohet se kanë shkaktuar zjarr në tregun e rrobave të përdorura.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.