Çështja penale ndaj Bektash Zenelit ka kaluar për shqyrtim në Gjykatën e Lartë të Shqipërisë, pas rekursit të paraqitur nga i pandehuri kundër vendimeve të mëparshme të dhëna nga gjykatat e posaçme.
Gazetari Besmir Pula raportoi për “MCN Live” se Zeneli është përfshirë në një nga dosjet që lidhen me trafikimin e lëndëve narkotike dhe veprimtarinë e një grupi të strukturuar kriminal që operonte mes Shqipërisë dhe Greqisë.
Hetimet për këtë çështje u zhvilluan në kuadër të operacionit policor të koduar “Limit”, i cili çoi në arrestimin dhe ndjekjen penale të disa personave të dyshuar për trafik droge.
Në shkallët e mëparshme të gjykimit, disa prej të pandehurve, përfshirë edhe Zenelin, u shpallën fajtorë dhe u dënuan me vite burgimi për veprat penale që lidhen me trafikimin e narkotikëve dhe pjesëmarrjen në grup të strukturuar kriminal.
Pas vendimeve të dhëna nga gjykatat e posaçme, pala mbrojtëse paraqiti rekurs në Gjykatën e Lartë, duke kërkuar rishqyrtimin e çështjes dhe ndryshimin e vendimit.
Dosja tashmë është marrë në shqyrtim nga kjo gjykatë, e cila do të vendosë mbi vlefshmërinë e pretendimeve të paraqitura në rekurs.
Vendimi i Gjykatës së Lartë pritet të përcaktojë nëse do të lihet në fuqi vendimi i dhënë nga shkallët më të ulëta të gjykimit apo nëse çështja do të rikthehet për rishqyrtim.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
