Policia e Tepelenës ka arrestuar një 40-vjeçar pasi shkaktoi një zjarr masiv në një tokë të marrë me qira, duke shkaktuar dëme të mëdha në zonën mes fshatrave Kodër dhe Lekël. Si pasojë e zjarrit, u dogjën 5 stane, 3 krerë bagëti, pemë frutore dhe sipërfaqe pyjore.
I dyshuari, me inicialet E. M., banues në fshatin Kodër, u identifikua dhe arrestua menjëherë pas ndërhyrjes së shpejtë të shërbimeve të Komisariatit të Policisë Tepelenë, në bashkëpunim me DVP Gjirokastër dhe shërbimet zjarrfikëse.
Zjarri, që dyshohet se u ndez në një tokë të marrë me qira nga 40-vjeçari, mori përmasa të mëdha dhe dëmtoi rëndë mjedisin pyjor, duke u përhapur me shpejtësi në një zonë të pyllëzuar dhe me bagëti.
Prej mëngjesit të djeshëm, perimetri i përfshirë nga flakët është në monitorim të vazhdueshëm nga policia, ndërsa operacionet për shuarjen e zjarrit vijojnë.
Materialet procedurale janë referuar Prokurorisë së Gjirokastrës, ndërkohë që 40-vjeçari do të përballet me akuzën për “Shkatërrim me zjarr i pyjeve dhe i mjedisit pyjor”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
