Shpërndante drogë në zona të ndryshme të Tiranës, kapet me 1 kg në makinë

Një operacion i policisë së Tiranës i koduar “Hide” ka zbuluar 1 kilogramë lëndë narkotike, duke vënë në pranga një person.

Efektivët e komisariatit Nr.2, pas marrjes së informacioneve se një person shpërndante kanabis, në zona të ndryshme të Tiranës, organizuan dhe finalizuan me sukses operacionin gjatë të cilit u vu në pranga H. H., 31 vjeç, banues në Tiranë, për veprën penale “Prodhimi dhe shitja e narkotikëve”.

Në rrugën “Dritan Hoxha”, në afërsi të një kompleksi pallatesh, gjatë kontrollit të ushtruar në automjetin e këtij shtetasi, nga shërbimet e Policisë, është gjetur dhe sekuestruar 1 kg lëndë e dyshuar narkotike kanabis sativa.

Nga veprimet hetimore të kryera, ka rezultuar se 31-vjeçari, pasi siguronte sasi të konsiderueshme të lëndës narkotike kanabis sativa, e ndante atë dhe e shiste më pas në doza, në zonën e Laprakës dhe te Fusha e Aviacionit.

Ndaj të dyshuarit materialet iu referuan Prokurorisë së Tiranës, për veprime të mëtejshme.