22-vjeçari arrestohet në Vlorë, kapet me kokainë në doza gati për shitje

Policia e Vlorës ka finalizuar një operacion të suksesshëm për goditjen e shitjes së lëndëve narkotike, duke arrestuar një 22-vjeçar në flagrancë.

Seksioni për Hetimin e Narkotikëve në Drejtorinë e Policisë Vlorë ka organizuar hetimet për zbardhjen e veprimtarisë kriminale të shpërndarjes së narkotikëve në disa lagje të qytetit. 

Pas kontrolleve, u arrestua shtetasi P. K., 22 vjeç, banues në lagjen “Hajro Çakëri”, Vlorë, për veprën penale “Prodhimi dhe shitja e lëndëve narkotike”.

Gjatë kontrollit fizik, shërbimet e Policisë gjetën dhe sekuestruan një sasi të dyshuar lëndë narkotike kokainë, e ndarë në 12 doza, gati për shitje.

Materialet procedurale iu referuan Prokurorisë pranë Gjykatës së Shkallës së Parë të Vlorës, për të vazhduar me veprimet ligjore të mëtejshme.