Makina përplaset me karrocën e tërhequr nga kafshë pune, plagoset një person në Korçë

Një person ka mbetur i plagosur në Korçë, si pasojë e përplasjes së një makine me një karrocë të tërhequr me kafshë pune.

Ngjarja është shënuar rreth orës 17:40, në aksin rrugor Korçë-Liqenas, në afërsi të fshatit Zvezdë, Maliq.

Automjeti tip “Volkswagen” me drejtues shtetasin A. K., 27 vjeç, banues në fshatin Vloçisht, Maliq, është përplasur me një karrocë të tërhequr me kafshë pune, me drejtues shtetasin A. A., rreth 80 vjeç, banues në fshatin Gollobërdë, Maliq, i cili për pasojë ka marrë dëmtime dhe u dërgua për mjekim në spitalin e Korçës, aktualisht jashtë rrezikut për jetën.

Me shtetasin A. K., po kryhen veprimet e mëtejshme procedurale. Ndërkohë grupi hetimor po punon për përcaktimin e shkaqeve të aksidentit.