Kosovë-Shqipëri, bashkëpunim në fushën e arsimimit e stërvitjeve të përbashkëta ushtarake

Ministria e Mbrojtjes së Kosovës dhe ajo e Shqipërisë do të thellojnë edhe më shumë bashkëpunimin vëllazëror në interes të sigurisë së dy vendeve.

Armend Mehaj, ministër i Mbrojtjes së Kosovës, në një status rrjete sociale, pas një takimi me homologun e tij nga Shqipëria, Niko Peleshi, ka bërë të ditur këto dy ministri, janë zotuar që për vitin e ardhshëm të rrisin bashkëpunimin në fushën e arsimimit dhe stërvitjeve të përbashkëta të ushtarakëve të Forcës së Sigurisë së Kosovës dhe Forcës së Armatosur të Shqipërisë.

Edhe në këtë takim me vëllain, Ministrin e Mbrojtjes së Republikës së Shqipërisë, Niko Peleshi ndamë kënaqësinë me sukseset e përbashkëta gjatë këtij viti, duke u zotuar që edhe në vitin e ardhshëm të rrisim bashkëpunimin në fushën e arsimimit e stërvitjeve të përbashkëta ushtarake, me fokus në forcimin e gatishmërisë për ndërveprim operacional sipas konceptit “Smart defense”.

Bashkëpunimi bilateral Kosovë -Shqipëri dhe rajonal me vendet partnere në fushën e sigurisë dhe mbrojtjes, është në interes të të dyja vendeve dhe në funksion të paqes, stabilitetit dhe sigurisë rajonale e më gjerë.

Së bashku jemi gjithmonë më të fortë!

Ndryshe muaj më parë, Mehaj, kishte bërë të ditur se FSK-ja dhe Forcat e Armatosura të Shqipërisë, kanë kryer stërvitje të përbashkët ushtarake.