Tre vëllezër në Pogradec, plagosin me thikë një të ri

Një sherr i ndodhur në një lokal në Pogradec ka përfunduar me një të ri të plagosur, nga ana e tre vëllezërve.

Specialistët për Hetimin e Krimeve të Komisariatit të Policisë Pogradec arrestuan në flagrancë vëllezërit Reli Oshafi, 28 vjeç, Redjol Oshafi, 30 vjeç dhe Xhoni Oshafi, 23 vjeç, banues në Pogradec, për veprën penale “Plagosja e rëndë me dashje”, kryer në bashkëpunim.

Policia thotë se tre të ndaluarit, mbrëmjen e djeshme, në një lokal, në lagjen nr. 2, Pogradec, gjatë një konflikti për motive të dobëta, dyshohet së kanë plagosur me thikë shtetasin E. H., 26 vjeç, banues në Pogradec, i cili u dërgua në spitalin e Traumës në Tiranë, për mjekim më të specializuar, aktualisht jashtë rrezikut për jetën.

Gjithashtu, në vijim të veprimeve procedurale të kryera për këtë rast u referuan materialet në Prokurori dhe filloi procedimi në gjendje të lirë për shtetasin A. H., 31 vjeç, vëllai i shtetasit E. H., banues në Pogradec, për veprën penale “Prodhimi, mbajtja, blerja apo shitja pa leje e armëve të ftohta”, pasi gjatë kontrollit të ushtruar nga shërbimet e policisë, në lokalin e tij ku ndodhi ngjarja, u gjet dhe u sekuestrua në cilësinë e provës materiale një përforcues grushti, dorezë metalike.