Dita ndërkombëtare e egjiptianëve të Ballkanit/ Avokati i Popullit: Prioritet trajtimi i të drejtave të pakicave kombëtare në vend

Dita e sotme shënon Ditën Ndërkombëtare të Egjiptianëve të Ballkanit, pjesë e bashkësisë të së cilës është edhe tërësia e anëtarëve të pakicës kombëtare Egjiptiane, që jetojnë në Shqipëri. Kjo datë është caktuar si e tillë, në kujtesë të mbledhjes së parë të Asamblesë të mbajtur në Ohër, në Maqedoninë e Veriut më 24 qershor 1990. Në nder të kësaj dite, institucioni i Avokatit të Popullit vlerëson se shënimi i kësaj dite është një rast i veçantë për të reflektuar mbi kontributin dhe rolin e rëndësishëm të kësaj pakice kombëtare në Shqipëri. “Në këtë ditë, ne duam të theksojmë vlerat e pamohueshme të cilat ata kanë sjellë dhe vazhdojnë të sjellin në shoqërinë tonë”, thotë institucioni i Avokatit të Popullit. “Në këtë ditë të veçantë, ne jemi të përkushtuar për të siguruar që të drejtat dhe interesat e pakicës kombëtare egjiptiane të respektohen dhe promovohen në mënyrë të plotë. Gjithashtu, vlerësojmë rëndësinë e bashkëpunimit dhe angazhimit të institucioneve shtetërore për të adresuar sfidat që përballon kjo pakicë. Së fundmi, le të nderojmë përkushtimin dhe kontributin e vazhdueshëm të pakicës kombëtare egjiptiane në shoqërinë tonë. Të bashkuar, duhet të përpiqemi për të krijuar një ambient të barabartë dhe të respektueshëm për të gjithë anëtarët e komunitetit egjiptian në Shqipëri. Me rastin e kësaj dite ne festojmë diversitetin, vlerat dhe ndihmën që kjo pakicë kombëtare sjell në jetën tonë. Ne vazhdojmë të jemi të përkushtuar për të përmirësuar kushtet e jetesës së të gjithë pakicave kombëtare në Shqipëri dhe për të ndërtuar një shoqëri më të përfshirëse dhe të drejtë për të gjithë”, thuhet në njoftimin e Avokatit të Popullit.