Sherri për përndjekjen e një vajze në Berat, përfundon me tre të arrestuar

Policia e Beratit thotë se ka parandaluar përshkallëzimin e një konflikti të vazhdueshëm mes disa personave, duke arrestuar tre prej tyre.

Shërbimet e Komisariatit të Policisë Berat, pasi kanë marrë njoftim se në lagjen “Uznovë”, Berat në ambientet e një lokali po konfliktoheshin disa persona, kanë organizuar menjëherë punën dhe kanë shkuar në vendin ku po ndodhte konflikti.

Në vijim të veprimeve, shërbimet e policisë kanë arrestuar në flagrancë shtetasit M. N., 36 vjeç, K. Ç.(N) 43 vjeç dhe E. A., 18 vjeç.

Të dyshuarit janë konfliktuar fizikisht me njëri-tjetrin, në ambientet e një lokali dhe kanë kundërshtuar punonjësit e policisë, të cilët kanë ndërhyrë për parandalimin e përshkallëzimit të konfliktit të përsëritur.

Në vijim të veprimeve u referuan materialet në Prokurori dhe nisi procedimi penal në gjendje të lirë për dy shtetas të tjerë të përfshirë në konflikt I. K.(A), 23 vjeçe, motra e shtetasit të arrestuar E. A.; M. N., 41 vjeç, vëllai i dy shtetasve të tjerë të arrestuar, i cili ishte shpallur në kërkim për veprën penale “Përndjekja”, pasi më datë 28 gusht, ka bërë kallëzim shtetasja I. K., 23 vjeçe se 41-vjeçari e përndiqte.

Materialet i kaluan Prokurorisë pranë Gjykatës së Rrethit Gjyqësor Berat, për veprime të mëtejshme.