Lëvizte me pistoletë në çantë dhe pushkë në shtëpi, arrestohet një person në Kurbin

Një person është vënë në prangat e policisë së Kurbinit gjatë operacionit të koduar “Zastava”, pasi lëvizte me armë me vete.

Bazuar në informacionet e marra nga qytetarët se një person mbante armë zjarri me vete, nga shërbimet e Komisariatit të Policisë Kurbin u organizua operacioni policor i koduar “Zastava”, si rezultat i të cilit u bë kapja dhe arrestimi në flagrancë i A. Gj., 38 vjeç, banues në Fushë Kuqe, Kurbin.   

Shërbimet e policisë, gjatë kontrollit fizik ndaj këtij shtetasi, në një çantë, i kanë gjetur dhe sekuestruar në cilësinë e provës materiale një armë zjarri pistoletë “Zastava”.

Në vijim të operacionit, gjatë kontrollit të ushtruar në banesën e 38-vjeçarit, shërbimet e Policisë kanë gjetur dhe sekuestruar një armë zjarri pushkë dhe një sasi municioni luftarak. 

Ndaj të dyshuarit materialet i kaluan Prokurorisë Kurbin, për veprime të mëtejshme, për veprën penale “Mbajtja pa leje e armëve luftarake dhe e municioneve”.