Dy të rinj i kanë shpëtuar mrekullisht vdekjes ditën e sotme, pasi rastësisht kanë zbuluar pakon me eksploziv që u ishte vendosur në automjetin e tyre.
Ata ishin nisur nga Tirana për në Pukë, me automjetin e tyre tip Benz teksa kanë ndaluar pas sinjalit që makina u ka dhënë. Siç tregon Klodiani, një nga personat që ishin në automjet, ata kanë ndaluar në autostradën Fushë-Krujë-Milot në afërsi të Gjormës, pas sinjalit që u ka dhënë llamba e vajit.
Pas sinjalit ata kanë zbritur për të hedhur vajin, por teksa po vendosnin në bagazhin e mjetit bidonin me pjesën e mbetur të vajit, kanë parë aty një pako të dyshimtë.
“Ndaluam për t’i hedhur vaj makinës pas sinjalit që na dha llamba e vajit. Pjesën e mbetur të bidonit të vajit do ta vendosnim në garazh dhe aty pamë edhe pakon e dyshimtë. Vumë re se diçka nuk shkonte, ajo nuk ishte e jona. U larguam menjëherë nga makina të frikësuar, dhe njoftuam policinë”, thotë ai.
Vetëm pak minuta më pas në vendngjarje mbërriti edhe njësia antieksploziv, por ka qenë i pamundur çmontimi i lëndës plasëse. Teksa ekspertët u larguan për një moment nga makina për të marrë pajisje të tjera, lënda plasëse, e llojit tritol, ka shpërthyer në mënyrë të pakontrolluar. Si pasojë është dëmtuar makina, por fatmirësisht pa persona të lënduar.
Sakaq, policia ka nisur hetimet për zbardhjen e plotë të ngjarjes, si dhe identifikimin e kapjen e autorëve të vendosjes së lëndës eksplozive.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
