I pyetur në MCN Live mbi drogën që pihet përmes tullumbaceve në ambientet e shkollave, ish-drejtuesi i lartë i Policisë Erzen Breçani e konsideroi situatën si alarmante.
Breçani tha se nëse do të ketë seriozitet dhe vullnet nga uniformat blu ky fenomen mund të parandalohet. Ai e vuri theksin te roli i oficerëve të sigurisë nëpër shkolla, por edhe vet shoqërisë shqiptare.
“Padyshim që është një situatë alarmante, pjesa më e rëndësishme dhe e ndjeshme e shoqërisë janë fëmijët. Përgjegjësia kryesore është e Policisë së Shtetit. Ka edhe shoqëria faje. Por ata që duhet të japin llogari pse ndodhin fenomenet është Policia e Shtetit. Ku ishin këta që shisnin këto tullumbace? Ne po i shohim në rrjetet sociale, që trullohen dhe u bie të fikët. Ka një plan masash që merren çdo fillim viti shkollor. Kontrollohet territori rreth e qark, ambientet, lokalet. Duhet të mblidhet një grup i madh që të kontrollojë që fëmijët tanë të jenë të paprekshëm. Nëse ka seriozitet dhe vullnet arrihet të parandalohet. Kemi oficerët e sigurisë nëpër shkolla, duhet të shihet, sa informacione japin, sa kontrolle kryhen nga punonjësit e policisë. Të shtohet edhe më shumë masa e sigurisë në ambientet rreth e qark shkollës. Patjetër që është struktura, por duhet edhe motivim”, tha Breçani.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
