Drejtoria e Policisë Fier ka njoftuar se janë arrestuar dy shtetas për ndezjen e zjarreve në Parkun Kombëtar të Vjosës dhe në Lushnjë, duke i nxjerrë ata para përgjegjësisë penale për shkatërrim pronash dhe dëmtim të habitateve mjedisore.
Specialistët për Hetimin e Krimeve të Komisariatit të Policisë Fier kanë arrestuar në flagrancë 61-vjeçarin Shezai Banaj, banues në fshatin Cakran, për veprat penale “Shkatërrimi i pronës me zjarr” dhe “Dëmtimi i habitateve në zonat e mbrojtura mjedisore.” Ai dyshohet se ka ndezur zjarre në luginën e lumit Vjosë, në vendin e quajtur “Mezarak,” duke shkaktuar djegien e një sipërfaqe të konsiderueshme toke (arë), 300 pemë ulliri dhe bimësi të ndryshme të Parkut Kombëtar të Vjosës.
Specialistët për Hetimin e Krimeve të Komisariatit të Policisë Lushnjë arrestuan 58-vjeçarin Arjan Kaja, banues në fshatin Dushk, për veprat penale “Shkatërrimi i pronës me zjarr” dhe “Kundërshtimi i punonjësit që kryen një detyrë shtetërore ose një shërbim publik.” Ai dyshohet se ka ndezur një zjarr në tokën e tij në fshatin Dushk, duke shkaktuar djegien e një sipërfaqe toke. Gjithashtu, ai ka penguar zjarrfikësit në përpjekjet e tyre për të shuar flakët.
Materialet procedurale iu referuan Prokurorisë pranë Gjykatës së Shkallës së Parë në Fier, për veprime të mëtejshme.
Drejtoria Vendore e Policisë Fier apelon për qytetarët të mos ndezin zjarre, pasi kjo do të sjellë pasoja penale.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
