Drafti i Kodit të ri Penal, i cili u hodh për konsultim publik një javë më parë, ka hasur në kundërshtimin e shumë ekspertëve. Kjo e detyroi kryeministrin të sqaronte përmes një postimi në rrjetin “X”, se “Ministria e Drejtësisë dhe Këshilli i Ministrave nuk kanë marrë pjesë në hartimin e draftit, por ia kanë besuar një grupi ekspertësh të nderuar, nën udhëheqjen e drejtorit të Shkollës së Magjistraturës, profesor Arben Rakipi.”
Nga ana tjetër, ekspertët e përfshirë në hartimin e draftit i thanë BIRN se Ministria e Drejtësisë ka pasur rol koordinues dhe kontribues në mënyrë të drejtpërdrejtë në hartimin e draftit, përmes përfaqësuesve të saj në grupin e punës. Sipas tyre, drafti iu dorëzua Ministrisë së Drejtësisë në vitin 2023, por u bë publik dy vjet më pas, në ditët e fundit të muajit të kaluar.
Pyetja që është ngritur më shpesh gjatë kësaj jave ka qenë ajo e përbërjes së grupit të punës që ka hartuar draftin, i kritikuar ashpër për mangësi.
Për BIRN, kësaj pyetjeje i ka dhënë përgjigje vetë zoti Rakipi.
Në listën e ekspertëve të përfshirë në procesin e hartimit të draftit, sipas tij, është ish-prokurori Bledar Mustafaraj, aktualisht Sekretariati Teknik pranë Ministrisë së Drejtësisë, si dhe magjistrati i komanduar në pozicionin e përgjegjësit të sektorit të së Drejtës Penale në Drejtorinë e Kodifikimit dhe Harmonizimit të Legjislacionit. Mustafaraj dha dorëheqjen nga detyra pas përfundimit të procesit të vetingut nga Komisioni i Pavarur i Kualifikimit, i cili ngriti dyshime për lidhje të tij me krimin e organizuar.
Anëtarë të tjerë të grupit të punës ishin: pedagogu Skënder Kaçupi; gjyqtari i Gjykatës së Lartë, Sokol Binaj; gjyqtarja e Apelit të Posaçëm, Tereza Merkaj; gjyqtari i Shkallës së Parë të Posaçme, Erjon Bani; dhe gjyqtari i Gjykatës së Tiranës, Gerd Hoxha. Nga organi i akuzës, pjesë e grupit ishin prokurorët Kujtim Luli, Arqile Koça, Ylli Pjetërnika dhe Andi Pogaçe.
Po ashtu, për draftin kanë kontribuar edhe përfaqësues të organizatave joqeveritare, pa përmendur emra konkretë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
