KED skualifikon tre kandidatura për anëtarë të Kushtetueses

Tre kandidatë të propozuar nga Gjykata e Lartë për vendet vakante në Kushtetuese janë skualifikuar nga Këshilli i Emërimeve në Drejtësi. Në mbledhjen e sotme të KED, pas shqyrtimit të akteve dhe procedurës së ndjekur për verifikimin e kandidaturave dhe dokumentacionin e përgatitur lidhur me plotësimin e kushteve ligjore për kandidim, u vendos ndalimi i kandidimit dhe mosvijimi i procedurës së verifikimit, vlerësimit, pikëzimit dhe renditjes të kandidatëve për gjyqtar në Gjykatën Kushtetuese për:

Z. Sinan Tafaj, për vendin vakant të zj. Vitore Tusha dhe vendin vakant të z. Gani Dizdari;

Zj. Dhimitrula Spiro, për vendin vakant të zj. Vitore Tusha dhe vendin vakant të z. Fatmir Hoxha;

Z. Saimir Vishaj, për vendin vakant të zj. Vitore Tusha, vendin vakant të z. Gani Dizdari dhe vendin vakant të z. Fatmir Hoxha.

Ndërerja e procedurave të kandidimit motivohet me mangësitë e konstatuara në një apo disa kushte të parashikuara nga Kushtetuta dhe ligji. Kandidatët kanë të drejtën e ankimit në Gjykatën Administrative të Apelit, jo më vonë së 5 ditë nga dita e njoftimit të vendimit të arsyetuar.