Vetëdeklarohen edhe punonjësit e policisë, afati i fundit 30 qershori

<p>Thellohet procesi i verifikimit të integritetit të punonjësve të Policisë së Shtetit. Në bazë të një urdhri të lëshuar nga drejtori i Përgjithshëm i Policisë së Shtetit, Muhamet Rrumbullaku, të gjithë pononjësit e Policisë së Shtetit do t’i nënshtrohen vetëdeklarimit. Procesi i vetëdeklarimit do të zgjasë deri më 30.06.2024 dhe punonjësit e Policisë së Shtetit do të deklarojnë edhe ndërprerjen e marrëdhënieve juridike të punës me Policinë e Shtetit, për plotësim të pasaktë ose të dhëna të pavërteta në formularin e vetëdeklarimit.</p> <p>Të dhënat që duhet detyrimisht të deklarohen janë:</p> <p>·&nbsp; Dënimi ose jo me vendim gjyqësor të formës së prerë nga autoritetet gjyqësore shqiptare ose të huaja, apo me vendim gjyqësor jopërfundimtar për një çështje penale të pazgjidhur me vendim gjyqësor të formës së prerë;</p> <p>·&nbsp; Shkelja ose jo e rregullave të sigurisë së informacionit të klasifikuar dhe tentimi ose jo i kryerjes së aktivitetit të paautorizuar në sistemet e komunikimit të informacionit të klasifikuar;</p> <p>·&nbsp; Qenia ose jo në hetim ose gjykim nga autoritetet shqiptare ose të huaja për vepra penale;</p> <p>·&nbsp; Qenia ose jo i ndaluar ose arrestuar nga organet ligjzbatuese shqiptare ose të huaja për vepra penale;</p> <p>·&nbsp; Caktimi ose jo i ndonjë mase shtrënguese të sigurisë personale;</p> <p>· Lëshimi ose jo i një urdhri kërkimi kombëtar ose ndërkombëtar për vepra penale;</p> <p>· Pasja ose jo e kontakteve të papërshtatshme, komunikimeve elektronike ose çfarëdolloj mënyre tjetër takimi apo komunikimi të qëllimshëm, me persona të përfshirë në krimin e organizuar;</p> <p>·&nbsp; Pranimi apo shkëmbimi, ose jo, i parave, favoreve, dhuratave ose pasurive me persona të përfshirë në krimin e organizuar.</p> <p><a href="https://www.fibank.al/individe/depozita-dhe-investime/depozita/depozita-e-hapur" target="_blank"><img alt height="100" src="https://www.mcntv.al/sites/default/files/fbank31.gif" style="float:left" typeof="foaf:Image" width="600"></a></p> <p>“Integriteti i shëndoshë i punonjësve të Policisë së Shtetit dhe pastrimi i strukturave nga elementë brenda nesh, të cilët shkelin ligjin dhe betimin, është një proces prioritar dhe i rëndësishëm. Askush që cenon besnikërinë ndaj uniformës së shenjtë të Policisë së Shtetit nuk do të ketë vend në strukturat e saj. Kam bindjen e plotë se, organizata e Policisë së Shtetit ka forcën dhe energjinë e duhur pozitive për të izoluar dhe larguar nga radhët e saj çdokënd, që devijon nga misioni i ruajtjes së rendit e sigurisë publike dhe lufta e pakompromis ndaj krimit”, shprehet Rrumbullaku në urdhrin e lëshuar.</p>