Kërkuan azil në Francë, riatdhesohen 25 shqiptarë

Janë rikthyer sot në Tiranë përmes aeroportit të Rinasit 25 shqiptarë që kishin kërkuar azil në Francë.

Policia e Shtetit bën me dije se shqiptarët janë shoqëruar me një eskortë policore sipas marrëveshjes me autoritetet e BE-së për kthimin e azilkërkuesve.

Policia i bën apel qytetarëve të mos kërkojnë azil në vendet e BE-së, pasi shanset që ta fitojnë janë zero.

Njoftimi i plotë i Policisë:

Riatdhesohen nga Lille, Francë, 25 shtetas shqiptarë që kishin kërkuar azil në Francë.

Ky operacion është zhvilluar në bazë të një marrëveshjeje me autoritetet përkatëse të BE-së, me të cilët janë bashkërenduar veprimet. Çdo grup të riatdhesuarish shoqërohet me një eskortë të Policisë shqiptare.

Operacione të tilla riatdhesimi do të vijojnë edhe gjatë muajve në vijim.

Policia e Shtetit apelon për të gjithë shtetasit shqiptarë që udhëtojnë për në vendet e BE-së, të respektojnë rregullat e lëvizjes në hapësirën Schengen dhe të mos kërkojnë azil, pasi shanset për ta fituar janë zero.

Ndërkohë, Policia Kufitare ka shtuar kontrollet në pikat e kalimit kufitar, për dokumentacionin dhe plotësimin e kushteve për të udhëtuar në vendet e BE-së, si dhe ka forcuar kontrollet në kufirin e gjelbër.