Një parcelë me 502 bimë narkotike kanabis sativa është identifikuar dhe asgjësuar nga policia e Tiranës në pyllin e Dajtit.
Siç bën të ditur policia e kryeqytetit, “në pyllin e Dajtit, është gjetur e mbjellë një parcelë me bimë narkotike, në të cilën kishte të mbjella 502 bimë të dyshuara narkotike dhe në krahë të kësaj parcele është gjetur dhe një kasolle e improvizuar në të cilën ishin të vendosura 507 degë bimësh të dyshuara narkotike të llojit kanabis sativa në proces tharjeje”.
Bimët e gjetura u asgjësuan me anë të djegies. Policia po punon për identifikimin dhe kapjen e autorëve të kësaj vepre kriminale.
Gjithashtu ka filluar procedimi penal për veprën penale të "Shpërdorimit të detyrës", dhe po punohet për gjetjen e shtetasit G. H., 61 vjeç, banues në Tiranë, pasi ky shtetas është roje i Shërbimit Pyjor në Dajt.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
