Shërbimet e Komisariatit të Policisë Has, në bashkëpunim me Policinë Kufitare Qafë Prush, kanë intensifikuar kontrollet në të gjithë territorin e bashkisë Has, në kuadër të masave për parandalimin dhe goditjen e kultivimit të bimëve narkotike.
Gjatë kontrolleve të zhvilluara në njësinë administrative Golaj, në territorin e fshatit Vlahën, policia konstatoi një numër të konsiderueshëm bimësh të dyshuara narkotike Cannabis Sativa, të cilat u asgjësuan me djegie.
Si rezultat i veprimeve hetimore, u arrestuan në flagrancë si autorë të dyshuar shtetasit Rr. U., 70 vjeç, dhe B. U., 34 vjeç, babë e bir, banues në fshatin Vlahën.
Ndërkohë, u shpall në kërkim edhe djali tjetër i 70-vjeçarit, shtetasi A. U., 44 vjeç.
Po ashtu, materialet procedurale iu referuan Prokurorisë dhe nisi procedimi penal në gjendje të lirë ndaj shtetasit Rr. S., 58 vjeç, me detyrë kryetar i fshatit Vlahën, i dyshuar për veprën penale "Shpërdorimi i detyrës".
Policia njofton se kontrollet do të vijojnë në të gjithë territorin e qarkut Kukës, me synim parandalimin dhe goditjen e veprimtarisë kriminale të kultivimit të bimëve narkotike.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Kukës për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
