Rast i emigracionit të paligjshëm në Vlorë, shpëtohen 11 emigrantë nga vende të ndryshme

Një gomone me 11 emigrantë të paligjshëm u sekuestrua në brigjet e Vlorës. 

Policia Kufitare u sinjalizua nga një telefonatë me numër grek, rreth orës 07:30 të ditës së sotme ku thuhej që një grup personash rrezikonin të mbyteshin në det, në veri të ishullit të Sazanit.

Menjëherë pas sinjalizimit, shërbimet e Policisë Kufitare u nisën drejt zonës duke arritur të shpëtonin të gjithë personat që ndodheshin në bord, ndërkohë që ende nuk është konfirmuar destinacioni që ata synonin.

Sipas raportimeve, emigrantët ishin: 5 nga Bangladeshi, 3 nga Pakistani, 1 nga Afganistani, 1 nga Haiti dhe 1 nga Liberia.

Ata janë dërguar në ambientet e Drejtorisë Vendore të Policisë Vlorë, ku po kryhen procedurat përkatëse.