Një shpërthim i fuqishëm me lëndë plasëse ka tronditur Kamzën pas mesnate, duke u regjistruar në murin rrethues të banesës së deputetit të Partisë Demokratike, Xhelal Mziu.
Gazetari Besmir Pula, në një raportim për “MCN Live”, bën me dije se kamerat e sigurisë së vetë banesës nuk kanë qenë funksionale për shkak të një defekti teknik, ndaj nuk kanë arritur të filmojë gjë por kamerat e sigurisë në lagje kanë fiksuar një person të vetëm.
Banesa e Mziut nuk ka pasur kamerat aktive pasi ishte shkëputur për shkak të një defekti dhe nuk kanë filmuar gjë.
Por nga hapja e kamerave të sigurisë në zonë është parë një person pranë banesës së Mziut i cili ka vepruar i vetëm dhe më pas është larguar pak minuta para se të ndodhte shpërthimi. Autori është parë i veshur me rroba të zeza, duke mos u shoqëruar nga persona të tjerë.
Burime nga grupi hetimor bëjnë të ditur se ende nuk është përcaktuar sasia e saktë e lëndës plasëse, pasi priten rezultatet nga ekspertiza e specializuar.
Në dëshminë e parë dhënë hetuesve, Xhelal Mziu ka deklaruar se nuk ka konflikte personale me askënd dhe nuk ka asnjë ide mbi arsyet apo autorët e ngjarjes.
Policia dhe grupi hetimor janë ende në vendin e ngjarjes dhe po vijojnë hetimet për të identifikuar autorin dhe për të zbardhur motivet e mundshme të këtij akti.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
