Një efektiv i Policisë së Tiranës dyshohet se është përfshirë në transportimin e rreth 1 milion eurove të padeklaruara nga Serbia drejt Kosovës.
Shuma e parave u sekuestrua të martën në Pikëkalimin Kufitar Merdarë nga autoritetet kosovare.
Gazetari Besmir Pula, në një lidhje për “MCN Live”, bëri me dije se bëhet fjalë për Aurel Kaziu, efektiv në Komisariatin nr. 5 në Tiranë.
Sipas tij, ende nuk dihet destinacioni final i shumës së parave dhe për llogari të kujt po transportoheshin ato.
Sipas njoftimit zyrtar, automjeti me të cilin udhëtonin të dyshuarit u ndalua në hyrje të Kosovës nga Serbia. Fillimisht, mjeti iu nënshtrua kontrollit përmes skanimit me rreze X, ku u identifikua një hapësirë e modifikuar dhe e dyshimtë në dyshemenë e furgonit.
Pas sinjaleve të marra, Dogana e Kosovës kërkoi asistencën e Policisë. Përmes pajisjes fibroskopike u konfirmua se në hapësirën e improvizuar ishin fshehur rreth 1 milion euro, të cilat nuk ishin deklaruar.
Bëhet me dije se të dyshuarit janë Ahmet Kaziu, polic në Komisariatin numër 5 në Tiranë, Ardit Laska dhe Etnik Ahmaxhokaj. Fillimisht ata janë ndaluar për një kontroll nga Dogana e Kosovës, ndërsa pas skanimit me rreze X është gjetur edhe sasia e parave.
Autoritetet po hetojnë për të zbardhur origjinën e parave dhe destinacionin e tyre përfundimtar.
Deri më tani, nuk dihet nëse shuma i përkiste vetë të ndaluarve apo po transportohej në emër të personave të tretë apo grupeve kriminale.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
