Shoqata e Avokatëve Antikorrupsion i ka dërguar sot një letër Këshillit të Lartë Gjyqësor dhe Inspektoriatit të Lartë të Drejtësisë, duke u kërkuar atyre pezullimin nga detyra të anëtarit të KLGJ-së Alban Toro.
Sipas Shoqatës në fjalë, Toro akuzohet për “falsifikim dokumentesh” dhe “deklarim të pavërtetë”.
Sipas tyre, zgjedhja e tij si anëtar i KLGJ-së është bërë në mënyrë të paligjshme, pasi janë shkelur rëndë procedurat për zgjedhjen e tij.
“Në kushtet kur nga Gjykata është urdhëruar regjistrimi i procedimit penal sipas kallëzimit e shikojmë të arsyeshme pezullimin nga detyra të shtetasit Alban Toro deri në përfundimin e hetimeve pasi vendimet që do merren prej tij në kuadër të ushtrimit të detyrës mund të cënojnë interesat e gjyqtarëve në vendimmarrje sipas ligjit të Këshillit të Lartë Gjyqësor”- shkruhet në shkresën e shoqatës së Avokatëve Antikorrupsion.
Alban Toro dyshohet se ka dorëzuar dokumente të falsifikuara për t’u zgjedhur anëtar i KLGJ, duke mashtruar me vitet e tij të punës. Ligji thotë se një anëtar i KLGJ-së duhet të ketë 10 vite punë pa ndërprerje si avokat, por Toro nuk e përmbush këtë kusht, pasi nga data 2 mars 2010 deri në datën 20 shtator 2011 e ka pezulluar aktivitetin e tij, por këtë fakt nuk e kishte paraqitur në dokumentet që ka dorëzuar në Kuvend.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
