200 euro për të kaluar kufirin drejt Greqisë, 5 të arrestuar në Kakavijë

Pesë persona janë arrestuar nga policia e Beratit për dhënie ndihme për kalimin e paligjshëm të kufirit.

Sektori për Hetimin e Narkotikëve dhe Trafiqeve në Drejtorinë Vendore të Policisë Berat në bashkëpunim me Drejtorinë e Forcës së Posaçme Operacionale, Sektorin për Hetimin e Trafikut të Paligjshëm në Drejtorinë e Policisë së Shtetit dhe SHÇBA, mbi bazën e një hetimi 3-mujor finalizuan me sukses operacionin policor të koduar “AZILANTI 5". Në kuadër të këtij operacioni u arrestuan në flagrancë 4 shtetas: Kreshnik Kotollaku, 34 vjeç, banues në Urë Vajgurore; Gezim Kapllani 55 vjeç, banues në Berat; Valentin Gremi, 35 vjeç, banues në Fier; Drini Çaçi, 39 vjeç, banues në Gjirokastër, me detyrë trup shërbimi në vijën e gjelbër në Drejtorinë Rajonale të Kufirit dhe Migracionit Gjirokastër.

Katër personat e mësipërm ditën e sotme janë kapur në flagrancë në pikën kufitare të Kakavisë, Gjirokastër duke kaluar në mënyrë të paligjshme drejt shtetit grek, 2 shtetas shqiptarë në këmbim të një shume monetare prej 200 euro për person. Gjatë operacionit janë sekuestruar në cilësinë e provës materiale: 2 automjete, 11 aparate celulare, si dhe 550 euro.