46 apo 100 bashki, kungullesha politike/ PS shkrin 15 bashki, PD të shtojmë 39 bashki. Dy drafte në votim

Pas afro një dekade, Shqipëria është përballë një tjetër riorganizimi të mundshëm të hartës administrativo-territoriale. Dymbëdhjetë vjet pas miratimit të hartës me 61 bashki, mazhoranca ka depozituar në Kuvend një projektligj që parashikon uljen e numrit të bashkive në 46, ndërsa Partia Demokratike ka paraqitur një model krejt tjetër, me 100 bashki dhe 6 rajone.

Por kur nisi të flitej për Territoriale 2?

Procesi aktual u formalizua në vjeshtën e vitit 2025. Kuvendi ngriti Komisionin e Posaçëm Parlamentar për Reformën Administrativo-Territoriale me vendimin nr. 75/2025. Në tetor 2025 u formalizua gjithashtu struktura e komisionit dhe bashkëpunimi PS-PD për procesin.

Debati për rishikimin e hartës së vitit 2014 kishte nisur edhe më herët. Në tetor 2025, Taulant Balla deklaronte se kishte kërkuar prej rreth tre vitesh që reforma të rishikohej pas një dekade nga miratimi i saj.

Procesi i konsultimit në territor vijoi gjatë pranverës së vitit 2026, me dëgjesa në të 12 qarqet.

Harta aktuale është ajo e përcaktuar nga Ligji nr. 115/2014, i miratuar më 31 korrik 2014. Ajo përcakton 12 qarqe dhe 61 bashki.

Harta aktuale është miratuar rreth 12 vjet e 2 muaj më parë, ndërsa është përdorur praktikisht që nga zgjedhjet vendore të vitit 2015, pra prej rreth 11 vitesh.

Projektligji i depozituar nga socialistët më 30 korrik 2026 parashikon kalimin nga 61 në 46 bashki, pra një reduktim me 15 bashki.

Sipas draftit, 28 bashki do të konsolidohen në 13 bashki të reja. Bashkitë që humbasin statusin e tyre janë:

Fushë-Arrëz, Klos, Rrogozhinë, Dimal, Poliçan, Patos, Divjakë, Selenicë, Maliq, Këlcyrë, Memaliaj, Libohovë, Cërrik, Belsh dhe Prrenjas.

Ndryshimi nuk është vetëm në numrin e bashkive. Drafti i PS-së parashikon edhe një strukturë të re të brendshme:

Bashki → Qytet → Njësi administrative.

Sipas projektit, nëse miratohet, vendi do të ketë 46 bashki, 71 qytete përbërëse dhe 387 njësi administrative.

Qytetet që Bashkohen në një bashki

• Dimal + Poliçan → Berat

• Klos → Mat

• Cërrik + Belsh → Elbasan

• Prrenjas → Librazhd

• Patos → Fier

• Divjakë → Lushnjë

• Selenicë → Vlorë

• Maliq → Korçë

• Këlcyrë → Përmet

• Memaliaj → Tepelenë

• Libohovë → Gjirokastër

• Fushë-Arrëz → Pukë

• Rrogozhinë → Kavajë

Një tjetër ndryshim territorial lidhet me Tiranën: drafti parashikon që Rinasi, si dhe zona të tjera të propozuara nga harta, t'i kalojnë Bashkisë së Tiranës.

Kampi opozitar me draftin e tij, njohur si Modeli i PD-së, shkon në drejtimin e kundërt.

Opozita ka propozuar 100 bashki, të organizuara në 6 rajone.

Sipas këtij modeli, qarqet aktuale do të grupoheshin në rajone më të mëdha:

• Shkodër–Lezhë: 16 bashki

• Dibër–Kukës: 13

• Tiranë–Durrës: 15

• Elbasan–Korçë: 19

• Fier–Berat: 19

• Vlorë–Gjirokastër: 18

Propozimi rikthen në hartë edhe disa njësi që u shkrinë me reformën e vitit 2014, mes tyre Velipoja, Kopliku, Petrela, Kashari, Dajti, Orikumi, Ksamil dhe të tjera.

Pra, përballë Kuvendit janë dy modele shumë të ndryshme:

61 → 46 bashki në propozimin e PS-së, ndërsa 61 → 100 bashki në propozimin e PD-së.

E pikërisht këto dy modele kanë sjellë edhe një ndarje në votën lokale përpara testit final, atë të votës në parlament.

Në votimet e dokumentuara deri tani, disa këshilla që do të jenë qendra të bashkimeve kanë dhënë pëlqimin, ndërsa disa prej bashkive që humbasin statusin kanë votuar kundër.

Këshilla që kanë dhënë pëlqim

• Elbasani: • Korça: • Librazhdi: • Përmeti: • Mati:

• Tirana: këshilli bashkiak miratoi me votat e mazhorancës relacionin që jep pëlqim për ndryshimet që prekin territorin e Tiranës, përfshirë Rinasin, Bërxullën dhe Domjen.

Këshilla që kanë votuar kundër

Kundërshtimi nuk ka ardhur vetëm nga këshillat bashkiakë. Ndër kryebashkiakët që janë shprehur publikisht kundër shkrirjes së bashkive të tyre janë:

Nertil Bellaj, kryetari i Selenicës, i cili ka kundërshtuar bashkimin me Vlorën. Adriatik Zotkaj, kryetari i Poliçanit, është shprehur kundër bashkimit me Beratin; në këshill, të 15 anëtarët votuan kundër.

Leonard Hide, kryetari socialist i Libohovës, ka dalë publikisht kundër bashkimit me Gjirokastrën dhe u ka kërkuar deputetëve të mos e votojnë projektligjin.

Albert Malaj, kryetari i Memaliajt, ka kundërshtuar shkrirjen e bashkisë dhe është shprehur publikisht kundër bashkimit me Tepelenën.

Fatjon Duro, kryetari i Patosit, është shprehur kundër bashkimit me Fierin dhe ka argumentuar se Patosi duhet të vijojë si njësi më vete.

Josif Gorrea, kryetari i Divjakës, është shfaqur publikisht kundër shkrirjes së Divjakës dhe bashkimit me Lushnjën.

Hilë Curri, kryetari i Fushë-Arrëzit, ka kundërshtuar bashkimin me Pukën dhe e ka cilësuar draftin të papranueshëm.

Ndërkohë, Florenc Doka, kryetari i Cërrikut, ka deklaruar se nuk do të mbajë qëndrim përfundimtar pa u përmbyllur dëgjesat me komunitetin.