Zjarri në banesën në Lushnjë nga rezistenca, një vajzë përfundon në spital nga asfiksia (VIDEO)

Një banesë u përfshi nga flakët mbrëmjen e djeshme në lagjen “Loni Dhamo”, në qytetin e Lushnjës. 

Nën një çati jetonin dy familje, në njërën pronari Rrapush Deliu me gruan, dhe në tjetrën një familje e komunitetit rom që e kishin marrë me qira. 

Gazetarja Evi Gjini raportoi për “MCN Live” se flakët e zjarrit nisën nga ambientet e banesës me qira. Si pasojë e flakëve, dy dhomat janë djegur pothuajse tërësisht nga zjarri, ndërsa pjesërisht u dogj edhe godina ngjitur. 

Dyshohet se shkak i zjarrit mund të ketë qenë rezistenca elektrike në të cilën po ngroheshin gjashtë fëmijë të vegjël nga mosha 1-12 vjeç të cilët ndodheshin tek gjyshërit e tyre. Dyshohet se fëmijët kanë neglizhuar afërsinë e rezistencës me divanin, duke bërë që të marrë flakë.

Si pasojë e tymit, një vajzë 12-vjeçare është dërguar në spital me shenja asfiksie, por ndodhet jashtë rrezikut për jetën.

Sipas pronarit të banesës në momentin e zjarrit ai po shihte televizor kur ka parë tymin që po vinte nga gjysma tjetër e shtëpisë ku dhomat e dhëna me qira po digjeshin.