40-vjeçari Besnik Koldreu, i arrestuar si i dyshuar për bashkëpunim në vrasjen e bashkëshortëve Kreshnik dhe Gentjana Mujeci, ngjarje e ndodhur më 26 prill të këtij viti në fshatin Balldren të Lezhës, do të vijojë të qëndrojë në burg.
Koldreu u paraqit para Gjykatës së Lezhës për rivlerësimin e masës së sigurisë të caktuar në mungesë ndaj tij. Gjatë seancës gjyqësore, e zhvilluar me dyer të mbyllura, ai mohoi çdo lidhje me ngjarjen kriminale.
Sipas burimeve, 40-vjeçari ka deklaruar se jeton dhe punon në Mal të Zi dhe se nuk kishte asnjë dijeni për automjetin e përdorur nga autorët e krimit, i cili dyshohet se ishte fshehur pranë banesës së prindërve të tij të moshuar në zonën e Torovicës.
Megjithatë, pavarësisht pretendimeve të tij, gjykata pranoi kërkesën e Prokurorisë dhe vendosi masën e sigurisë “Arrest në burg” ndaj Besnik Koldreut për veprën penale “Përkrahja e autorit të krimit”, e kryer në bashkëpunim.
Koldreu u arrestua nga autoritetet malazeze në Ulqin pasditen e 17 qershorit, pasi ishte shpallur në kërkim në kuadër të hetimeve për vrasjen e çiftit Mujeci.
Ndërkohë, në arrati vijojnë të jenë tre persona të tjerë të dyshuar si autorë të krimit: Renato, Florin dhe Adriano Mhillaj. Sipas hetimeve paraprake, ata dyshohet se kanë vepruar në bashkëpunim me njëri-tjetrin për realizimin e vrasjes.
Kreshnik dhe Gentjana Mujeci u ekzekutuan me breshëri plumbash teksa udhëtonin me automjetin e tyre në aksin Balldren–Torovicë, në Lezhë.
Nga hetimet e deritanishme rezulton se motivi i ngjarjes dyshohet të jetë hakmarrja.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
