Përfshihet nga flakët kati i dytë i një banese në Elbasan, shpëtohen dy të moshuar

Dy të moshuar kanë shpëtuar pas ndërhyrjes së policisë teksa një banesë dy katëshe në Elbasan është përfshirë nga flakët.

Ngjarja ka ndodhur rreth orës 14:40, ku shërbimet e Forcës së Posaçme “Shqiponja” të DVP Elbasan, gjatë patrullimit në lagjen “Emin Matraxhiu”, kanë konstatuar zjarrin në katin e dytë të banesës.  

Punonjësit e Policisë kanë ndërhyrë menjëherë për të bërë të mundur shuarjen e zjarrit, që dyshohet se është shkaktuar për shkak të rrjedhjes së gazit nga një bombol. 

Gjithashtu i kanë dhënë ndihmën e parë dy të moshuarve që ishin në banesë, të cilët janë jashtë rrezikut për jetën.

Grupi hetimor po punon për sqarimin e rrethanave të ngjarjes.