Kryeministri Edi Rama ishte i pranishëm sot në prezentimin e 36 autoambulanca të reja për Urgjencën Shëndetësore, të cilat mes tjerash do të jenë në luftën antiCovid.
“Gjithë ajo lemeri dhe rrënimi i çerekshekulli tashmë është pas krahëve. Me gjithë këtë digjitalizim, mbetet vetëm për të mbajtur nivelin dhe për të vazhduar me intensitet. Në momentin kur të kalojë flama e covid-it, do të jetë situata më e qetë. Do jetë më e stabilizuar situata dhe do të rritet shpejtësia e shërbimit. Me 36 autoambulancat e reja moderne, përmbyllet programi i transformimit të flotës sonë të Urgjencës Shëndetësore, nga një inventar karakatinash me 4 rrota në një fuqi të motorizuar e të pajisur me standardet më të mira europiane. Imagjinoni vetëm sikur pandemia ta kishte gjetur Shqipërinë me katërrrotakët e katërshes së sotme opozitare dhe sidomos me LSI në drejtimin e shëndetësisë, se çfarë hataje kombëtare do të kishte qenë”, thotë Rama.
Ministrja e Shëndetësisë, Ogerta Manastirliu ka bërë me dije se flota e re e ambulancave është një investim i qeverisë shqiptare, në kuadër të investimeve për përballimin e pandemisë. Ajo ka bërë me dije se me këtë flotë të re është dyfishuar edhe numri i shërbimit të Urgjencave.
"Janë të mirëpajisura me të gjitha pajisjet shpëtuese, investim i qeverisë shqiptare në kuadër të fondeve të qeverisë shqiptarë në kuadër të investimeve për pandeminë. Objektivi ynë për t'iu përgjigjur thirrjeve në kohë është realizuar. Ekipi i Urgjencës është dyfishuar se me rritjen e numrit të ambulancës kërkohej edhe një numër më i madh i stafit dhe tashmë ato janë dyfishuar", tha Manastirliu.
Kreu i Urgjencës Kombëtare, Brataj tha se “te këto autoambulanca janë 4400 litra oksigjen, ndërsa janë të pajisura me setin e trajtimit të pjesës kardiake, setin e traumës etj”. “Është një minispital që shkon te pacienti. Gjithë ky investim e justifikon më së miri trajtimin e pacientit në banesë”.
Ai theksoi se shpejtësia e arritjes te pacienti nga urgjenca është në një mesatare prej rreth 13.5 minutash. “Bëhet fjalë për urgjenca të arrestit kardiak, traumën, lindjet dhe është e njëjta me Europën dhe botën. Nuk ka asnjë ndryshim si kohë mbërritje tek pacienti”, tha ai.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
