395 trupa nga Regjimenti i Këmbësorisë së Jugut me 58 mjete dhe një togë nga Forca e Sigurisë së Kosovës zhvilluan në datat 23-26 shtator, stërvitjen e koduar DIMALI-24.
Ministri i Mbrojtjes, Pirro Vengu bëri të ditur se në stërvitjen që u mbajt në rajonin Arshi Lengo, Gjirokastër, u testuan kapacitetet operacionale të Forcave të Armatosura të Shqipërisë për zhvendosjen dhe kryerjen e operacioneve luftarake mbrojtëse si dhe ndërveprimi me forcat e tjera.
“Kjo stërvitje, ashtu si edhe stërvitjet e mëparshme shërben edhe për t’iu përgjigjur në kohë nevojave të brendshme, duke siguruar kontribute ushtarake modeste, por dinjitoze për misionet dhe operacionet e drejtuara nga NATO, Bashkimi Evropian, apo OKB”, tha Vengu.
Në ceremoninë e mbylljes së kësaj stërvitjeje mori pjesë shefi i Shtabit të Përgjithshëm të FA, gjeneralmajor Arben Kingji, komandanti i Forcës Tokësore, gjeneralmajor Ilir Xhebexhija, delegacioni i FSK i kryesuar nga shefi i Shtabit të FT të FSK kolonel Valdet Berisha, drejtori i SHPFA gjeneralbrigade, Aleksandër Pando si dhe përfaqësues nga SHPFA dhe komandantët e reparteve vartëse të Forcës Tokësore.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
