Një operacion i koduar “River”, i zhvilluar nga Specialistët për Hetimin e Narkotikëve në DVP Durrës në bashkëpunim me Komisariatin e Policisë Shijak, ka çuar në arrestimin në flagrancë të një 59-vjeçari në Shijak.
Arsenal armësh dhe kokainë janë zbuluar në një banesë në Shijak, gjatë një operacioni të policisë që përfundoi me arrestimin e një 59-vjeçari.
Në pranga ra shtetasi me iniciale Sh. V., i dyshuar për një sërë veprash penale, përfshirë trafikimin e armëve dhe municionit, mbajtjen pa leje të armëve, prodhimin dhe shitjen e narkotikëve, si dhe posedimin e armëve të ftohta.
Sipas burimeve zyrtare, nga hetimet dyshohet se 59-vjeçari i trafikonte armët me qëllim shitjen në zonën e Shijakut.
Gjatë kontrollit të ushtruar në banesën e tij, policia gjeti dhe sekuestroi një arsenal të konsiderueshëm, përfshirë: 2 armë zjarri (pistoleta) me krehra dhe fishekë, 3 armë gjahu, municion luftarak të kalibrave të ndryshëm dhe pjesë armësh, 3 palë dylbi (një e përshtatur për armë), 1 dron, 8 armë të ftohta (thika), 24 doza të lëndës së dyshuar narkotike kokainë, 1 peshore elektronike dhe 6 telefona celularë.
Operacioni u realizua mbi bazën e informacioneve të siguruara në rrugë operative, në kuadër të goditjes së veprimtarive kriminale në këtë zonë.
Policia bën me dije se hetimet vijojnë për dokumentimin e plotë të aktivitetit kriminal dhe identifikimin e personave të tjerë të përfshirë.
Materialet procedurale i janë referuar Prokurorisë së Durrësit për veprime të mëtejshme.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
