Kajmaku përmes avokatit kërkon lirinë në arrati, sekuestrohet telefoni i vartësit të tij

Ish-kryetari i Bashkisë së Vorës Agim Kajmaku ka apeluar vendimin e Gjykatës së Tiranës, e cila ka caktuar masën ''arrest me burg''.

Ai është shpallur në kërkim nga policia për akuzat e ''shpërdorimit të detyrës'', ''shkelje të ligjit të dekriminalizimit'' dhe ''ushtrim të detyrës në përfundim të mandatit''. Sipas sistemit TIMS-s, ish-kreu i bashkisë së Vorës rezulton të jetë brenda territorit të Republikës së Shqipërisë.

Nga ana tjetër, Prokuroria e Tiranës sekuestroi telefonin e vartësit të Kajmakut, Gentian Picarit, i cili zgjodh prej këtij të fundit si n/kryetar, pasi dyshohet se Picari nuk ka dhënë informacione për vendodhjen e Kajmakut dhe mund të ketë komunikuar me Kajmakun.

Ndërkohë, Gentian Picari (ish-shefi i kabinetit të Bashkisë së Vorës) ka bërë kërkesë në gjykatë për të marrë sërish telefonin e tij.

Pasi KQZ-ja i hoqi mandatin e kryebashkiakut në 1 nëntor, Prokuroria e Tiranës lëshoi urdhër-arrestin për Agim Kajmakun.

Për më shumë se një javë Agim Kajmaku është shpallur në kërkim. Prokuroria njoftoi se se Kajmaku rezulton në kërkim për 3 vepra penale. Sipas dokumentit bëhet me dije se veprat për të cilat akzuzohet ish-numri 1 i Vorës, janë:  “Shpërdorimi i detyrës”, “Falsifikimi i vulave, stampave ose formularëve” dhe “Kryerja e funksionit pas dhënies fund të tij”. Në bazë të Kodit Penal, këto vepra janë të rënda dhe dënimi shkon deri në 15 vite burgim.