Goditet një rast i organizimit të lojërave të fatit në Berat, 12 persona nën hetim

Goditet një tjetër rast i organizimit të lojërave të fatit në kundërshtim me ligjin në Berat, në vijim të operacionit të koduar “Fati i lojërave”.

Si rezultat i këtij operacioni u procedua penalisht A. Gj., 27 vjeç, banues në Berat, organizator i kësaj veprimtarie, si dhe 11 shtetas të tjerë, pjesëmarrës në lojën e organizuar në ambientin e marrë me qira nga shtetasi A. Gj., për veprat penale “Organizimi ose ushtrimi i veprimtarive të lojërave të fatit në kundërshtim me ligjin” dhe “Vënia në dispozicion e lokaleve për lojëra të palejuara”.

Uniformat blu gjatë kontrollit të ushtruar në ambientet e magazinës që shtetasi A. Gj., e kishte marrë me qira, kanë gjetur dhe sekuestruar në cilësinë e provës materiale një tavolinë pokeri, çipsa dhe letra bixhozi.

Aktualisht vijon puna për evidentimin dhe goditjen e rasteve të tjera të veprimtarisë së paligjshme në fushën e organizimit të lojërave të fatit, ndërkohë që për ndjekje të mëtejshme, materialet iu referuan Prokurorisë së Beratit.