Zjarri i rënë në venddepozitimin e mbetjeve në landfillin e Bushatit vijon të jetë aktiv edhe gjatë orëve të paradites, duke e mbajtur situatën ende të paqëndrueshme në zonë.
Korrespondentja Bendis Druni raporton për “MCN Live” se, megjithëse vatrat e zjarrit janë vënë nën kontroll, prezenca e tymit mbetet e rëndë dhe shqetësuese për banorët përreth.
Flakët nuk janë shuar plotësisht dhe në disa pjesë të landfillit vijon djegia e mbetjeve.
Intensiteti i tyre ndryshon herë pas here, duke reflektuar një situatë ende të paqëndrueshme.
Ndërkohë, tymi i dendur është përhapur në zonat përreth, duke u ndier në disa lagje dhe duke shkaktuar shqetësim tek banorët.
Sipas informacioneve nga terreni, zjarri është favorizuar nga kushtet e erës, ndërsa situata po menaxhohet dhe mbahet nën kontroll nga strukturat përkatëse.
Në operacion janë angazhuar rreth 20 efektivë të shërbimit zjarrfikës, me 3 automjete zjarrfikëse, në bashkëpunim me punonjësit e landfillit dhe Policinë Bashkiake.
Në ndihmë kanë mbërritur edhe forca nga bashkitë Shkodër, Lezhë, Tiranë dhe Kamëz, duke garantuar një reagim të koordinuar ndërinstitucional.
Për shuarjen e flakëve janë përdorur edhe mjete të rënda, si ekskavatorë dhe kamionë, me qëllim izolimin e vatrave dhe kufizimin e përhapjes së zjarrit.
Sipas autoriteteve, zjarri ka përfshirë kryesisht mbetje urbane dhe aktualisht nuk paraqet rrezik të drejtpërdrejtë për banesat përreth.
Megjithatë, reja e tymit që ka mbuluar zonën mbetet problematike për komunitetin.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
