Kushtetuesja mblidhet në fillim të janarit, çështjet që do të shqyrtohen

Pas betimit të anëtarit të shtatë, Gjykata Kushtetuese pritet të zhvillojë mbledhjen e parë në fillim të janarit.

Kjo është vendosur në mbledhjen e gjyqtarëve, e cila u zhvillua sot pas plotësimit të Kushtetueses me tre anëtarët e rinj: Altin Binaj, Përparim Kalo dhe Sonila Bejtja.

Në mbledhjen e parashikuar në fillim të vitit tjetër pritet të shqyrtohen çështjet që sipas ligjit i përkasin për kompetencë Mbledhjes së Gjyqtarëve, si dhe për të kryer veprimet e nevojshme përgatitore dhe organizative për funksionimin e Gjykatës Kushtetuese.

Në bazë të ligjit, mbledhja e Gjyqtarëve të Gjykatës Kushtetuese ka këto kompetenca:

a) përcakton drejtimet kryesore të shpenzimeve të mjeteve buxhetore;

b) informohet çdo 6 muaj me raporte për shpenzimet buxhetore;

c) vendos për strukturën organizative të Gjykatës Kushtetuese;

ç) vendos për numrin e nëpunësve të administratës, të Njësisë së Shërbimit Ligjor dhe punonjësve të tjerë, si dhe kriteret profesionale që duhet të përmbushin dhe pagat e tyre;

d) miraton rregulloren për procedurat gjyqësore të Gjykatës Kushtetuese, si dhe rregulloren e brendshme për veprimtarinë e administratës së Gjykatës Kushtetuese;

dh) emëron dhe shkarkon Sekretarin e Përgjithshëm; e) cakton kolegjet në fillim të çdo viti kalendarik, sipas Rregullores së Gjykatës Kushtetuese;

ë) shqyrton në shkallë të fundit ankimet e nëpunësve civilë dhe punonjësve të tjerë për largimin nga detyra;

f) vendos për masat disiplinore ndaj këshilltarëve ligjorë.