Një 67-vjeçar është gjetur i vrarë me thikë mëngjesin e së shtunës në vendin ku punonte si roje në fshatin Mbrostar Ura në Fier. Viktima është identifikuar si Petraq Gjika, banues në fshatin Daullas.
Ai u gjet pa shenja jete, ndërsa në trup i janë konstatuar plagë të shkaktuara nga një mjet prerës. 67-vjeçari u gjet në ambientet jashtë serrave që ai ruante gjatë natës. Ngjarja u zbulua rreth orës 06:40 nga banorët e zonës.
Në vendin e ngjarjes ka shkuar grupi hetimor ku ka bërë këqyrjen e vendit ku u gjet viktima, ndërkohë që objekti është i pajisur me kamera sigurie.
Sipas burimeve nga policia, Petraq Gjika është sulmuar dhe më parë me thikë. Korrikun e vitit 2018 ai është qëlluar nga një person teksa ishte duke pirë kafe në lokal, pranë vendit të punës. Në atë kohë, Gjika mbërriti në spital i gjakosur, jashtë rrezikut për jetën.
Me plagë në fyt dhe në bark, Petraq Gjika i mbijetoi asaj ngjarje, por fatkeqësisht, në ngjarjen e ndodhur mëngjesin e së shtunës ai ka ndërruar jetë. Nuk dihet nëse dy ngjarjet kanë lidhje me njëra-tjetrën, por 4 vite më parë autori u arrestua dhe ishte Xhevat Bregu.
Sakaq, banorët e fshatit Mbrostar të Fierit janë shprehur në vendngjarje se 67-vjeçari ka qenë njeri i mirë dhe nuk ka pasur probleme në fshat. Sipas tyre, Gjika ka pasur probleme vetëm me të vëllanë që është kryeplak i fshatit, me të cilin nuk flisnin prej një kohe të gjatë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
