Policia ka shpallur në kërkim drejtuesin teknik të firmës së ndërtimit ku humbi jetën 36-vjeçari Anton Zefi, si pasojë e një aksidenti në vendin e punës.
Sipas njoftimit zyrtar nga Drejtoria Vendore e Policisë Lezhë, 52-vjeçari S. T., banues në Lezhë, po hetohet për veprat penale “Shkelja e rregullave të mbrojtjes në punë” dhe “Punësimi i paligjshëm”.
Ngjarja ndodhi një ditë më parë, në një objekt në ndërtim në zonën e Kunës, në Shëngjin, ku 36-vjeçari Anton Zefi, banues në fshatin Pllanë, Lezhë, ra nga lartësia e kantierit gjatë punës dhe humbi jetën në vendngjarje.
Hetimet e kryera nga specialistët për Hetimin e Krimeve të Komisariatit të Policisë Lezhë zbuluan se ndarja tragjike nga jeta e punëtorit ka ndodhur në kushte të dyshuara shkeljeje të rregullave të sigurisë në punë, ndërsa ka dyshime se ai ishte i punësuar në mënyrë të paligjshme.
Materialet u referuan në Prokurorinë pranë Gjykatës së Shkallës së Parë të Juridiksionit të Përgjithshëm Lezhë, ndërkohë që vijojnë hetimet për zbardhjen e plotë të rrethanave të ngjarjes.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
