Një ngjarje e rëndë ka tronditur fshatin Zërvaskë të Pogradecit, ku një elektricist rreth moshës 60-vjeçare ka humbur jetën pas kontaktit me rrymën elektrike.
Sipas informacioneve paraprake, viktima është identifikuar si Agim Beqiri, i cili prej vitesh punonte si elektricist pranë Bashkisë së Pogradecit dhe merrej me mirëmbajtjen e rrjetit të ndriçimit rrugor në zonat rurale.
Dyshohet se 60-vjeçari kishte shkuar për të riparuar një defekt në një linjë elektrike, por gjatë ndërhyrjes ka rënë në kontakt me rrymën dhe ka humbur jetën. Sipas banorëve, jashtë kamerave, ai kishte evidentuar defektin një ditë më parë dhe ishte rikthyer sot për të kryer ndërhyrjen.
Paraprakisht dyshohet se në shtyllë ndodheshin dy linja tensioni, ndërsa viktima kishte ndërprerë vetëm njërën prej tyre, duke lënë aktive tjetrën, me të cilën më pas ka rënë në kontakt fatal.
Mësohet se ai ka qëndruar për disa minuta pa shenja jete në shtyllë, derisa shërbimet kanë bërë të mundur zbritjen e trupit të pajetë. Në momentin e ngjarjes ai ishte i pajisur me mjetet e sigurisë.
Grupi hetimor ndodhet në vendngjarje dhe po punon për zbardhjen e plotë të rrethanave të aksidentit.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
