Policia e Krujës ka finalizuar operacionin e koduar “Mukja”, në kuadër të kontrolleve për parandalimin dhe goditjen e veprimtarive kriminale në fushën e narkotikëve.
Gjatë operacionit, shërbimet e Komisariatit të Policisë Krujë arrestuan në flagrancë shtetasin N. Z., 31 vjeç, ndërsa shpallën në kërkim bashkëpunëtorin e tij, J. M., 43 vjeç, të dy banues në fshatin Mukaj.
Sipas hetimeve paraprake, dy personat dyshohet se kishin kultivuar në një zonë pyjore të fshatit Mukaj 42 bimë të dyshuara narkotike cannabis sativa, të cilat u asgjësuan nga policia.
Gjatë kontrollit në zonën ku kultivoheshin bimët narkotike, efektivët gjetën dhe sekuestruan gjithashtu 600 gramë lëndë të dyshuar narkotike cannabis sativa.
Policia vijon punën për kapjen e personit të shpallur në kërkim dhe për dokumentimin e plotë ligjor të kësaj veprimtarie kriminale.
Materialet procedurale i janë referuar Prokurorisë për veprat penale “Prodhimi dhe shitja e narkotikëve” dhe “Kultivimi i bimëve narkotike”.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
