Polici i vrarë në Fier përcillet sot për në banesën e fundit, homazhe në teatrin e Bylisit

Novruz Cenaila, polici i cili u vra me një plumb në kokë teksa po shkonte të merrte shërbimin, do të përcillet sot për në banesën e fundit.

Aktualisht po mbahen homazhe në hollin e teatrit Bylis në Fier. Miq, familjarë dhe kolegë të ish-efektivit po kryejnë përcjelljen e fundit, për 28-vjeçarin që u vra nga një plumb në kokë.

I pranishëm në homazhe ka qenë edhe ministri i Brendshëm Taulant Balla, i shoqëruar nga deputetja Ermonela Felaj, drejtori i Përgjithshëm i Policisë së Shtetit, Muhamet Rrumbullaku si dhe kreu i bashkisë së Fierit, Armando Subashi.

Ndërsa nga pamjet duken në rresht të parë edhe familja e të ndjerit, vëllai, motra, nëna, babai dhe nusja.

Efektivi i policisë Novruz Cenalia u vra dy ditë më parë në fshatin Baltez pas një konflikti të çastit me 23 vjeçarin Azgan Mernica i cili pas kryerjes së kësaj vrasje është në arrati.

Prej dy ditësh forcat e policisë, forcat speciale RENEA kanë vijuar kërkimet për gjetjen e autorit duke u shtrirë në disa qytete të jugut të vendit.