Zbulohen rreth 4 mijë rrënjë kanabis në banesën e drejtorit të Burgut të Rrogozhinës, Bilal Hasa, shpallet në kërkim

Rreth 4 mijë rrënjë kanabis sativa janë zbuluar ditën e sotme në një banesë në një fshat të Peqinit.

Sipas informacioneve paraprake, banesa dyshohet se i përket Bilal Hasës, drejtor i Burgut të Rrogozhinës, i cili është shpallur në kërkim nga policia.

Policia e Elbasanit ende nuk ka dalë me një reagim zyrtar për këtë rast, ndërsa hetimet vijojnë.

Sipas burimeve, brenda një magazine, që dyshohet se i përket Hasës, janë gjetur të paktën 4 mijë rrënjë kanabis sativa, të kultivuara në mënyrë hidroponike.

Ndërkohë, Bilal Hasa është shpallur në kërkim për interes hetimor dhe raportohet edhe pezullimi i tij nga detyra deri në sqarimin e plotë të ngjarjes.

Peqin/Finalizohet operacioni policor i koduar “Kurtaj” për goditjen e kultivimit të bimëve narkotike në ambiente të mbyllura me anë të llambave.

Operacioni u zhvillua nga Drejtoria për Krimet në Volum në Drejtorinë e Përgjithshme të Policisë së Shtetit, në bashkëpunim me DVP Elbasan dhe Komisariatin e Policisë Peqin, nën drejtimin e Prokurorisë Elbasan.

Zbulohen 2 ambiente të përshtatura për kultivimin e bimëve narkotike.

Sekuestrohen rreth 4000 bimë kanabisi, llamba, neonë dhe pajisje të tjera elektrike.

Shpallet në kërkim pronari i ambientit.

Në kërkim edhe përgjegjësi i OSHEE-së për Peqinin, për shpërdorim detyre.

Në vijim të planit të masave për evidentimin dhe goditjen e kultivimit të bimëve narkotike në ambiente të mbyllura, bazuar edhe në informacionet e siguruara në rrugë operative, shërbimet e Policisë në kuadër të operacionit policor të koduar "Kurtaj", ushtruan kontroll në fshatin Kurtaj, njësia administrative Gjocaj.

Gjatë kontrollit, në bodrumin e një magazine, u konstatuan 2 ambiente të përshtatura për kultivimin e bimëve narkotike me anë të llambave, ku ishin kultivuar rreth 4000 bimë kanabis.

Nga veprimet hetimore rezultoi se ambienti është në pronësi të shtetasit B. H., i cili u shpall në kërkim.

Në vijim të veprimeve, për veprën penale “Shpërdorimi i detyrës”, u shpall në kërkim edhe shtetasi E. M., me detyrë përgjegjës i OSHEE-së për zonën e Peqinit.

Shërbimet e Policisë vijojnë punën për kapjen e tyre.

Operacioni, nën drejtimin e Prokurorisë Elbasan, vijon, ndërsa po punohet intensivisht për identifikimin dhe nxjerrjen përpara përgjegjësisë penale të personave të tjerë të përfshirë në këtë veprimtari kriminale.