Zbardhen katër vjedhje në Orikum, në pranga dy persona me precedentë

Zbardhen 4 raste të vjedhjes në Orikum, duke u vënë në pranga dy autorët e dyshuar, me precedentë të mëparshëm kriminal.

Specialistët për Hetimin e Krimeve të Komisariatit të Policisë Vlorë, në vijim të punës për parandalimin e vjedhjeve, zbardhjen e atyre të ndodhura më parë dhe vënien e autorëve përpara përgjegjësisë ligjore, nisur dhe nga ankesat e disa qytetarëve, në bashkëpunim me Stacionin e Policisë Orikum, kanë organizuar dhe finalizuar operacionin policor të koduar “Shatai”.

Si rezultat i këtij operacioni u bë arrestimi i shtetasve:

-Besnik Kushtaj, 43 vjeç dhe Lionel Konomi, 26 vjeç, të banues në fshatin Dukat i Vjetër, Orikum.

Nga veprimet hetimore dyshohet se këta shtetas, në bashkëpunim me njëri-tjetrin, kanë kryer 4 vjedhje të ndryshme, konkretisht:

-më datë 07.09.2023, dyshohet se kanë vjedhur pajisje pune në një lokal, në rrugën nacionale Llogara-Orikum;

-më datë 15.05.2023, dyshohet se kanë vjedhur sende me vlerë dhe aksesorë të ndryshëm, brenda në automjeti rulot me targa gjermane, në aksin rrugor Llogara-Orikum; 

 -më datë 02.05.2023, dyshohet se kanë vjedhur bizhuteri floriri dhe sende me vlerë, në një banesë në fshatin Dukat;

-më datë 02.03.2023, dyshohet se kanë vjedhur pajisje elektroshtëpiake në një banesë në fshatin Dukat.  

Materialet procedurale i kaluan Prokurorisë, për veprime të mëtejshme, për veprën penale “Vjedhja”, kryer në bashkëpunim.