Një 45-vjeçar shqiptar, i shpallur në kërkim ndërkombëtar prej vitit 2022 për trafik narkotikësh, është arrestuar në Tiranë gjatë një operacioni të përbashkët mes policisë së Venecias dhe policisë shqiptare.
Sipas autoriteteve italiane, ai konsiderohej një trafikant droge i rangut të lartë dhe ishte subjekt i një njoftimi të kuq të lëshuar nga Sekretariati i Përgjithshëm i Interpolit në Lion.
45-vjeçari ishte hetuar në periudhën 2019-2021 në kuadër të operacioneve antidrogë të koordinuara nga Prokuroria e Qarkut të Venecias dhe të zhvilluara nga Skuadra Fluturuese italiane.
Ai ishte dënuar përfundimisht nga Gjykata e Apelit e Venecias për “komplot për trafik narkotikësh” dhe “trafik droge”. Sipas vendimit të gjykatës, shqiptari kishte rol kyç në një organizatë kriminale të strukturuar që vepronte në Venecia dhe merrej me importimin dhe shpërndarjen e kokainës.
Hetimet kanë nxjerrë në pah se 45-vjeçari ishte drejtuesi operacional dhe vendimmarrësi kryesor i grupit kriminal, duke koordinuar aktivitetin e trafikut të drogës në territorin italian.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
