Përmbaruesit shkojnë në hotelin e tyre për ekzekutimin e vendimi, babë e bir i kapin me grushte

Dy përmbarues gjyqësorë të cilët iu kishin shkuar në ambientet e hotelit të tyre në Librazhd, për të ekzekutuar një vendim civil për dëmshpërblim, janë dhunuar nga babë e bir, të cilët i kanë goditur me grushte. Pas marrjes së njoftimit se në ambientet e një hoteli në fshatin Mirakë, dy shtetas kishin goditur me grushte, për shkak të detyrës, dy përmbarues gjyqësorë, specialistët për Hetimin e Krimeve të Komisariatit të Policisë Librazhd kanë organizuar punën dhe kanë mbërritur në vendngjarje, me qëllim nxjerrjen përpara përgjegjësisë penale të shtetasve përgjegjës. Për këtë rast u arrestuan në flagrancë shtetasit M. H., 50 vjeç dhe N. H., 24 vjeç, babë e bir, të dy banues në Elbasan, pasi dyshohet se për shkak të detyrës, kanë goditur me grushte dy përmbarues gjyqësorë, të cilët kishin shkuar në ambientet e hotelit të dy shtetasve të arrestuar, për të sekuestruar pajisje të këtij hoteli, në zbatim të një vendimi civil të vitit 2014, të Gjykatës së Elbasanit, me objekt dëmshpërblimin e shtetasve të tjerë. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme, për veprën penale “Goditje për shkak të detyrës”.