Policia e Shtetit ka finalizuar një tjetër fazë të operacionit ndërkombëtar të koduar “Fast”, duke arrestuar në Durrës një 23-vjeçar të shpallur në kërkim ndërkombëtar nga autoritetet italiane.
Në pranga ka rënë Latif Biba, 23 vjeç, i cili kërkohej nga drejtësia italiane për veprat penale “Prodhimi dhe shitja e lëndëve narkotike” dhe “Grupi kriminal në fushën e trafikimit të lëndëve narkotike”.
Sipas njoftimit të Policisë së Shtetit, operacioni u zhvillua nga Sektori për Kërkimin (FAST Albania) në Drejtorinë e Forcës së Posaçme Operacionale, në bashkëpunim me Drejtorinë Vendore të Policisë Durrës, pas një shkëmbimi intensiv informacioni mes Interpol Tiranës dhe Interpol Romës.
Autoritetet bëjnë me dije se Gjykata e Breshias kishte lëshuar në muajin mars 2026 një urdhër arresti ndaj 23-vjeçarit, i dyshuar si pjesëtar i një grupi kriminal me aktivitet në prodhimin, shitjen dhe trafikimin e lëndëve narkotike.
Pas lokalizimit dhe arrestimit të tij në Durrës, Interpol Tirana po bashkëpunon me homologët italianë për finalizimin e procedurave të ekstradimit të të riut drejt Italisë.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
