“Gracka” u kodua një operacion i policisë së Tiranës, gjatë të cilit u vunë në pranga dy persona të cilët i vodhën portofolin, një shtetasi në një qendër tregtare.
Specialistët për Hetimin e Krimeve të Komisariatit të Policisë Nr. 1, në vijim të punës për goditjen e paligjshmërisë në fushën e vjedhjeve ndaj pronës dhe pasurisë, pas kallëzimit të marrë nga një shtetas, për vjedhjen e portofolit të tij, në një qendër tregtare, kanë organizuar dhe finalizuar operacionin policor të koduar “Gracka”.
Si rezultat i këtij operacioni u bë arrestimi në flagrancë i shtetasve A. K., 46 vjeç dhe D. Sh., 51 vjeç, të dy banues në Kosovë.
Këta shtetas, ditën e djeshme, në një qendër tregtare, i kanë vjedhur portofolin shtetasit K. M.
Nga verifikimet hetimore ka rezultuar se dy të arrestuarit janë autorë edhe të dy vjedhjeve të tjera të ndodhura ditët e fundit, konkretisht: më datë 11.01.2023, i kanë vjedhur shumën 450 euro shtetasit F. B., ndërsa më datë 12.01.2023, kanë tentuar të vjedhin një shumë parash, në një lokal.
Në cilësinë e provës materiale u sekuestruan 590 euro dhe 25 000 lekë të rinj.
Materialet i kaluan Prokurorisë, për veprime të mëtejshme procedurale.
MCN TV është një televizion gjeneralist, i cili përfshin emisione, seriale, filma, dokumentarë etj. Ky televizion ka në dispozicion të tij katër studio televizive të pajisura me teknologjinë bashkëkohore.
